Mar 16 | GbrGAW | STEP | Sanu n Satiwyi ɓei la duya Maryamu Magadalin n Salomi yi, n Maryamu Yakubu ʼya yi ɓa kun yalo n emi sinda-yi nya yi shi n na shin zafi to wa bwo nyin

Mark 16

Wo La Lakala

1 Sanu n Satiwyi ɓei la duya Maryamu Magadalin n Salomi yi, n Maryamu Yakubu ʼya yi ɓa kun yalo n emi sinda-yi nya yi shi n na shin zafi to wa bwo nyin 2 Nla-bmiyi, nyipyei kpeɓe, ɓa lo Yesu vingwo n emiyi hoi shi. 3 Ɓalo ɓai da n zokwo shi ɓa ɓe kpe vingwo kutaya n kwo gu n vingwo bwo nyi.

4 Ama shi ɓa ɓei si ɓa gye kuta-shanwoyi n pmiya shi, n vingwoyi guya gni. 5 Ɓalo vingwo mi ɓa gye ɓiniyi sase tu n bwai-zhe-bwa n na aje bui kpe. Ceʼa wo anyikwo-zayi. 6 Ama Malaika cige, “Ceto wo fyem. Fye ta zan Yesu Nazaratiyi nu shin, n na ɓei zun wo du nyin? Wo to dna lo yam. Wo la laka n vingwo. Fye gye aba nu nwo nayi ɓei shi. 7 Fye lo n sayiye fye gna Owabara nabari deye (n Bitrus yi ɓe). Yesu gyilo n fya-bye woi lo Galili fye ɓo gye wo ɓo shi wo ɓei gna fye tunyi to woi fim.”

8 Anyi-kwoza yi ɓa kun n vingwo n vinvinyi, ednayi wo ɓa ɓodo n ɓowo-woyi har to ɓa mi m ɓa daɓom.

9 N Ladiwyi yi nu n labmiyi n Yesu ɓei laka n vingwo, eza n wo ɓei kmiwo gye Maryamu Magadalin nu – nyikwozayi n wo ɓei kun alijenu ya ngnu tnaba n wo nyi. 10 – 11 Wa gye abara fi n bugbawun ɓai cibwi, wa gna ɓa ge wo la gye Yesu, woi n wye-wyei lo. Ama to ɓa gawo gaiciyam. 12 N sadohoyi, dna nyipyei yimi, wa wu wohin n aza ngun aba aba ɓai kun Urushelima ɓai lo ezhi ɓiyi ho, ama to ɓa kpe woyem, ntuge wo ɓei la wohin pmibma wuɓa. 13 Sanu mɓa ɓei kpewo ye, ɓa busi lo Urushelima ɓa wu oɓa zaje lafiya, ama to a ga ɓa gaiciyam.

14 Nnavun, wa wu wohin n wo abara a wocei-gmanyi aba ɓai yezhi ɓai gyi nyagyi. Wa gnakni ɓa ntu ɓa tna gaiciya gaɓo. Nya kwo ɓei zhin to ɓa ga aza gaiciya mɓa ɓei gna ɓa ge ɓa ku gye wo wye nyin.

15 Wa pmi wa gna ge, “Fye lo anyi vinya, fya zhin nabari manayi waʼazi n zaho-zahoi aba n nabaho-bahoyi yi. 16 Aza mɓa ga gaiciya a zhinɓa baptisma, ɓa ɓa pwo. Ama aza mɓa to ga gaiciyan, a ɓei zunɓa kni.

17 “Aza mɓa ga gaiciya ɓa ɓei zhin ampani n mi ikoyi ɓa kun aljanu ya, ɓai daɓo n na nyitala woyi yi. 18 Ba ɓei mi ɓai wan awa to ɓaye zhinɓa nyahon, ko ɓa sin emwi, kwo ta zhin ɓa nyahon, ɓa ɓei mi ba kpe a bwa n na nyasanyi ɓa kaɓa gna.”

19 Sanu Dagayi Yesu ɓei ku ɓeda zoda mɓai, a lawo lo cei n eshemi wa sase tu n Shekwoyi bwai-zhe bwa. 20 Owo abara laɓa n bwaho-bwahoyi ɓai zhin waʼazi, Dagayi kunsun n ɓai. Wa wu ge ɓo ɓa danyi gaiciya nu, n na ɓo, awo-woyi yi mɓa bei zhin nyi.